Johannesburg Verander Area
  • Vandag

    18°C / 6°C

    Wind 21km/h

    Reënval 0.0mm

    Humiditeit 38%

  • Woensdag

    16°C / 8°C

    Wind 7km/h

    Reënval 0.0mm

    Humiditeit 38%

  • Donderdag

    18°C / 9°C

    Wind 17km/h

    Reënval 0.0mm

    Humiditeit 32%

  • Vrydag

    20°C / 8°C

    Wind 15km/h

    Reënval 0.0mm

    Humiditeit 27%

  • Saterdag

    19°C / 8°C

    Wind 12km/h

    Reënval 0.0mm

    Humiditeit 25%

  • Sondag

    18°C / 8°C

    Wind 15km/h

    Reënval 0.0mm

    Humiditeit 24%


Verbruikersforum

Maandag 20 Mei 2013

Bank erken tweede kaart was ’n fout

Carla Kruger was nie hoopvol dat sy haar probleem by Standard Bank sou oplos nie.

“Ek het in die verlede tweede kaarte aan my rekening gekoppel gehad. Ek het hulle egter in 2006 gestop. Toe ek onlangs van my internetbankdienste gebruik maak, sien ek ’n klomp transaksies op my rekening wat ek nie gemaak het nie. Ná vele oproepe waar ek van die een afdeling na die ander en weer terug verplaas is, het ek my plaaslike Standard Bank besoek om te kla.

“Hul verweer was dat ek moes bewys ek het nie die transaksies aangegaan nie.

“Dit blyk ’n tweede kaart is op my rekening uitgereik en aan iemand anders oorhandig. Net ek het tekenreg op my rekening en dis vir my onaanvaarbaar dat ’n kaart wat aan my rekening gekoppel is aan iemand anders uitgereik is. Dit het alles gebeur enkele dae nadat ek my besonderhede by die bank op datum gebring het. Standard Bank is vol verskonings, maar bied nie oplossings aan nie.”

Tot u Diens het Standard Bank gevra om kommentaar te lewer. Hulle sê die tweede kaart is wel verkeerdelik uitgereik.

Hulle het ’n krediet aan Kruger toegestaan vir die transaksies wat met hierdie kaart op haar rekening gedoen is.

Voorts het Standard Bank Kruger om verskoning gevra vir die ongerief wat veroorsaak is.

Dok 2 keer op vir motorversekering

Helein Cato het ook met haar bank vasgesit. Haar klagte is oor Absa.

“My voertuig is deur Absa gefinansier. Ek het vroeër vanjaar ’n skrywe van hulle ontvang wat my versoek om ’n bewys van versekering te lewer of anders gaan Absa namens my versekering op die voertuig uitneem.

“Twee dae later het ek die nodige bewysstukke aan Absa gelewer. ’n Maand later het Absa egter meer as R300 van my rekening verhaal vir versekering op my motor.”

Cato het Absa gekontak om te probeer uitvind wat aan die gang is.

“Ek het weer die nodige dokumentasie vir hulle gestuur en gevra dat hulle die fout regstel.

“Ek is nie seker of my e-pos die nodige uitwerking gaan hê nie en ek het al drie keer na die nommer gebel wat op die brief verskaf is, maar kon nog nie met iemand gepraat kry nie.”

Ons het Absa gevra om ondersoek in te stel. Hulle het die versekering wat namens Cato uitgeneem is, gekanselleer en die premies aan haar terugbetaal.

Vra korting oor internetkontrak

Wollie Wolmarans het by Tot u Diens kom afpak met sy klagte oor Game.

“Ek het ’n rekenaar by Game gekoop. Hulle het ’n beleid wat behels die kliënt sal korting op die artikel ontvang mits dit binne 21 dae elders goedkoper bekom kan word. Binne hierdie tydperk is dieselfde rekenaar vir dieselfde prys elders verkoop, maar het ook ’n internetkontrak en modem ter waarde van R399 ingesluit.”

Wolmarans het Game per e-pos gekontak om te hoor of hulle hom tegemoet sal kom.

“Ek het twee bestuurders by my plaaslike winkel per e-pos gevra of hulle my korting op my aankope sal gee of van gelyksoortige internetkontrak sal voorsien. Hulle wou niks hoor nie aangesien hulle die ander verskaffer se prys nie as minder beskou nie.”

Ons het Wolmarans se klagte vir Game gestuur.

Game het wel besluit om Wolmarans vir die verskil in waarde van die internetkontrak te vergoed.

Homemark traag met terugbetaling

Andries van Tonder sê die diens wat hy by Homemark gekry het, het hom geskok.

“Ek het in November verlede jaar ’n artikel by Homemark bestel. Dit was sowat ’n maand later nog nie afgelewer nie en ek het hulle versoek om liefs die bestelling te kanselleer en ’n terugbetaling aan my te maak.

“Hulle het hiertoe ingestem, maar twee weke later het Homemark my weer gekontak en gevra wat hulle in die plek van die vorige bestelling kan stuur.

“Ek het dit aan hulle duidelik gemaak ek soek my geld, nie ’n ander artikel nie. Daar het nog niks van gekom nie en hulle reageer nie meer op my e-posse nie.”

Tot u Diens het Homemark gepols oor Van Tonder se klagte.

Hulle het hom om verskoning gevra dat daar nie al vroeër aan sy versoek aandag gegee is nie.

’n Terugbetaling is nou aan hom gemaak.

Betaal vir R30 000, kry net R21 000 uit

Elvira Pieterse het by Outsurance vasgebrand nadat sy in ’n motorongeluk betrokke was.

“Ek het my motor sowat agt jaar gelede gekoop en by Outsurance verseker vir ’n waarde van R30 000. Verlede maand het ’n dronk bestuurder teen my vasgery en my motor is afgeskryf. Tot my verbasing wou Outsurance net R21 000 op my kar uitbetaal. Ek dink nie dis regverdig nie en dis nou boonop al meer as twee weke later en die R21 000 kom ook nie te voorskyn nie.”

Ons het Outsurance se aandag op Pieterse se klagte gefokus.

Hulle sê sekere dokumentasie is nie aan hulle gelewer nie.

Pieterse het dit nou aan hulle verskaf en die eis is tot haar tevredenheid afgehandel.

Uitgelag toe hy geld terugvra weens gesloer met onderdeel vir ratkas

Cobus Potgieter is warm onder die kraag weens ’n onderonsie met Acar-Salvage van Silverton, Pretoria.

“Ek het in Januarie ’n onderdeel vir my voertuig se ratkas by Acar bestel en daarvoor betaal. Volgens hulle sou die onderdeel binne vier dae beskikbaar wees. Ná ’n maand was daar egter nog geen taal of tyding oor die betrokke onderdeel nie. Ek het gevra hulle moet my geld teruggee.

“Ná verskeie e-posse het hulle net bly verskonings maak.

“Uiteindelik het hulle ’n datum vir die betaling gegee. Die geld is nie betaal nie.

“Ek het hulle gebel om te vra wat gebeur het, maar hulle het my uitgelag en die foon in my oor neergesit.”

Tot u Diens het Acar gevra om moeite van Potgieter se klagte te maak.

Hulle sê Potgieter was moontlik met die verkeerde afdeling by Acar in kontak om reëlings vir die terugbetaling te tref.

Potgieter wag steeds.

Klagte van die week

Die nuwe BlackBerry-selfoon wat Johan Joubert op kontrak by MTN bekom het, was vir hom ’n groot teleurstelling nadat hy lank daarvoor gewag het.

“Ek moes my huidige BlackBerry, wat my uitstekende diens gegee het, in Februarie vervang. MTN het my laat weet ek is een van hulle gelukkige kante wat een van die eerste mense in Suid-Afrika sal wees om die nuwe BlackBerry Z10 te kry. Hieroor was ek nogal opgewonde, maar het ná ’n rukkie besef MTN is nie gerat om hierdie nuwe produk behoorlike ondersteuning te gee nie.

“Vir die eerste twee weke kon ek net oproepe maak en SMS’e stuur.

“Die res van die foon se funksies was onbruikbaar. Toe ek by die plaaslike MTN-winkel navraag doen, het hulle gesê die probleem lê by my SIM-kaart. Nadat dit vervang is, kon ek darem BlackBerry se eie boodskapdiens begin gebruik. Steeds was die ander funksies nie bruikbaar nie.

“In ’n later stadium moes ek hoor ’n klomp van die funksies sou eers ná ’n paar maande beskikbaar wees, maar niemand by MTN het my dit gesê toe ek aanvanklik die foon gekry het nie. Ek voel hier het die opleiding van hul personeel ver tekortgeskiet.

“Van die probleme was volgens MTN weens sagteware wat weer geïnstalleer moes word. Dis gedoen en ek het met moeite ’n nuwe e-posadres gekry, maar daar was nog geen sprake daarvan om my ou e-posadres te kan gebruik nie.

“Laastens het een funksie self begin aanskakel. Dit maak nie saak hoe ek daarmee gespook het nie, dit wou net nie af nie.

“Ek het hierdie probleem aangemeld en my selfoon is vir drie weke weggestuur vir herstelwerk.

“Ek het dit teruggekry en die funksie was wel af, maar dit skakel steeds by tye vanself aan.

“Ek is nou by die punt wat ek regtig net ’n ander selfoon wil hê, want ek is moeg gesukkel.”

Tot u Diens het MTN gepols oor Joubert se klagte, maar hulle het nie gereageer op ons versoek om terugvoering nie.

Pluimpies

Hennie Henning het pluimpies vir Outsurance en Multispray Panelbeaters.

“Ek wil sowel Outsurance as Multispray bedank vir hul flink diens om my motor herstel te kry.

“Ek is gereeld op die hoogte gehou met die vordering van die herstelwerk. Nadat die werk afgehandel is, het ek hard na foute gesoek, maar ek kon niks kry nie.”

Die diens van Ford in Modimolle het Henk en Elmarie Horst se goedkeuring weggedra.

“Ons voertuig het onklaar geraak terwyl ons met vakansie was en ons het Ford op Modimolle genader. Hennie Botha het tot by die oord waar ons vakansie gehou het uitgery om ons voertuig na te gaan. Van daar het hy gereël om ons motor tot by die werkwinkel te sleep en dit was binne ’n dag herstel. Boonop was ons motor silwerskoon toe ons dit teruggekry het. Hennie het nadat ons ons voertuig teruggekry het, gebel om te hoor of alles in orde is en selfs om uit te vind of ons veilig by die huis aangekom het.”

Paula Hofmeyr sê Foam City, Villieria, het nuwe lewe aan haar ou meubels gegee.

“My sitkamerstel is seker al meer as 70 jaar oud. Foam City kon my egter goeie raad gee om die stel ’n nuwe baadjie te gee, maar dit steeds soos ’n stel van sy era te laat lyk. Boonop was hul pryse heel billik.”

Wenke wat werk

Hier is ’n paar punte wat verbruikers in gedagte moet hou wanneer ’n probleem met ’n produk of diens sou opduik:

1. Maak seker van wat jou regte is. Lees die kontrak met die verskaffer goed deur en let op na hoe die produk of diens beskryf word. ’n Foutiewe produk kan herstel of vervang word of ’n ­terugbetaling kan ook oorweeg word.

2. Moenie uitstel nie. Maak dadelik werk daarvan om jou misnoeë aan die verskaffer te kenne te gee. Verduidelik wat die probleem is en wat jy daaraan gedoen wil hê.

3. Hou alle dokumentasie wat jy saam met die produk kry. Jy kan byvoorbeeld gevra word vir ’n bewys van aankope. Voorts is dit ’n goeie idee om bewyse te hou van die stappe wat gedoen is om die probleem te probeer regstel. Maak aantekeninge van wie jy wanneer gebel het en wat gesê is.

4. Probeer eers om jou klagte informeel opgelos te kry. Baie maatskappye het afdelings wat ingerig is net om klagtes te hanteer. Probeer om met ’n persoon wat besluite neem te praat. As die informele aanslag nie werk nie, stel jou klagte op skrif.

Kla so by ons

Verbruikers kan hul klagtes nou elektronies by Tot u Diens indien. Stuur ’n e-pos na totudiens@beeld.com.

Klagtes wat elektronies ingedien word, kan spoediger afgehandel word. U kan ook ’n faks stuur na 086 693 5146. Onthou om die maatskappy se faksnommer en besonderhede in te sluit.



  • aktueel

    ‘Politiek gaan nie werk’

  • spotprent

    Beeld se spotprent, 30 Julie 2014

  • hoofartikels

    Korrupsie kan tot sterftes lei

  • rubrieke

    Taal word só ’n smal poort vir uitreik

  • briewe

    My hart bloei oor baie dinge, van my hond, tot Gasa, tot kerk se dwaling . . .

  • rubrieke

    Taegrin se stem roep tot ons

  • briewe

    Bybel misbruik

  • voorblad

    Beeld se voorblad, 30 Julie 2014

  • briewe

    Moeg om bang, agter tralies en platsak op eie grond te wees

  • briewe

    Beeld eer 20 m. jong lewens gepas

  • briewe

    Gelowiges wat soek na meer van God se misterie, kry dit dikwels buite kerk

  • sielsgoed

    Goeie Nuus

  • So sê Beeld-lesers op Facebook en Twitter

  • Wat sê jy?

  • rubrieke

    Vernedering wat klou soos ’n neet

  • aktueel

    Nuwe gees gee Kerk weer ’n kans

  • rubrieke

    Talle blink uit sonder matriek

  • spotprent

    Beeld se spotprent, 29 Julie 2014

  • hoofartikels

    Vrede in Israel verg politieke wil

  • briewe

    Als sal regkom in nuwe sonskynnasie

  • briewe

    Ek het gedien en salueer generaals

  • voorblad

    Beeld se voorblad, 29 Julie 2014

  • briewe

    Vakansieklub-lede word só uitgebuit

  • briewe

    Ons is moeg vir al hierdie e-bollie

  • briewe

    Pak kwotas in sportsoorte trompop

  • briewe

    Sluit dan maar net die OB se kantoor!

  • sielsgoed

    Goeie Nuus

  • So sê Beeld-lesers op Facebook en Twitter

  • Wat sê jy?

  • spotprent

    Beeld se spotprent, 28 Julie 2014

  • rubrieke

    Moenie EFF as ’n grap afmaak

  • voorblad

    Beeld se voorblad, 28 Julie 2014

  • hoofartikels

    Zuma móét getuig voor kommissie

  • rubrieke

    Skoorsoek 101: Laat 26 van jou 40 vroue erf

  • briewe

    Croucamp verwater goeie argument so

  • briewe

    Hoekom kap niemand Medunsa nie?

  • briewe

    Héle FNB-stadion sing ‘Stem’-deel

  • briewe

    Motiewe laat RAU sneuwel

  • Wat sê jy?